harshilsays

આમ જોવા જઈએ તો 'પાણીપત' નું 4થું યુદ્ધ આવનારા સમયમાં જોવા મળે તો નવાઈ નહીં. કારણ કે વિકાસના નામે સમગ્ર માનવજાત એટલી હદે આંધળુકિયા કરી રહી છે કે આવનારી વિનાશકારી આફતો જે ઘર આંગણે દરવાજા પર દસ્તક આપે છે તેનો ખ્યાલ પણ રહ્યો નથી. હમણાં જ NASA નો રિપોર્ટ આવ્યો કે ગત વર્ષ (2023) એ માનવજાતના ઈતિહાસનું સૌથી ગરમ વર્ષ હતું. ન માત્ર એ જ પરંતુ રોજે રોજ બદલાતા જતા વૈશ્વિક આબોહવા પરિવર્તન (ગ્લોબલ વોર્મિંગ) વિશે સમાચારપત્રોની હેડલાઇન્સ હોય છે. છેલ્લા ઘણા સમયથી રોજેરોજ વિશ્વના કોઈ એકાદ ખૂણેથી કંઈક ને કંઈક માઠા સમાચાર મળી રહ્યા છે. એમાં આપણે (ભારત) પણ બાકાત નથી. UN એ પણ આ વર્ષની શરૂઆતમાં જ ચિંતા વ્યક્ત કરી હતી કે ભારત પાણીની તંગીનો સામનો કરી રહ્યું છે. બીજા એક રિપોર્ટ અનુસાર વિશ્વની એક ચતુર્થાંશ વસ્તી ધરાવતા 25 દેશો પાણીની તંગીનો સામનો કરી રહ્યા છે. વૈશ્વિક સ્તરે લગભગ 4 અબજ લોકો વર્ષમાં ઓછામાં ઓછા એક મહિના માટે પાણીની કટોકટીનો સામનો કરે છે. આ આંકડો 2050 સુધીમાં 60% વધશે. આની વચ્ચે પોપકોર્ન જે રીતે ફૂટે એ રીતે ભારતના સિલિકોન વેલી તરીકે ઓળખાતા અને લગભગ દોઢેક કરોડની વસ્તી ધરાવતા બેંગલુરુ શહેરમાં છ...

મારાં સપનાં તારી આંખે સાચાં પડતાં જાય એને નવું વર્ષ કહેવાય… હું કંઈ પણ ના બોલું તો પણ તરત તને સમજાય એને નવું વર્ષ કહેવાય… ખુલ્લી સવાર જેવું જીવશું કાયમ મસ્ત મજાનું,  પકડાઈ જવાની મજા પડે ને એવું કાઢશું બહાનું,  લાભ, શુભ ને ચોઘડિયાં પણ અંદરથી શરમાય એને નવું વર્ષ કહેવાય… જીવન એવું જીવશું જાણે સહજ અવતરે પ્રાસ, વ્હાલ નીતરતાં શ્વાસમાં ઘૂંટશું ઇશ્વરનો અહેસાસ, ટૂંકમાં, તારી સાથે દિવસો ઉત્સવ થઈ ઉજવાય એને નવું વર્ષ કહેવાય… – અંકિત ત્રિવેદી લાભ શુભના અખંડ દીવા પ્રગટે દ્વારે દ્વાર, થાય મનોરથ પૂર્ણ સૌના, દૂર થાય અંધકાર, નવા વર્ષનો પ્રેમ સદાય પ્રગટે અપરંપાર... ધરતી પર રહેવું છે, સાથ પવનની વહેવું છે, અજવાળાને પહેરીને ખળખળ ખળખળ કહેવું છે, બીજા માટે થોડું જીવીએ કરવો છે નિર્ધાર, આભને એનો ભાર ન લાગે એમ જીલવો ભાર, નવા વર્ષનો પ્રેમ સદાય પ્રગટે અપરંપાર... મન મક્કમ ને હૃદય અડીખમ, આફત વચ્ચે ઊભા અણનમ, ભાડું બસ ફરિયાદ વગરનું, જોવું સત્યમ, શિવમ અને સુંદરમ , હૂંફ, ભરોસો, વ્હાલ બધાનો, અરસપરસ આધાર બધાનો, દરેક તારીખ નવું વર્ષ ને વાર બધા તહેવાર, નવા વર્ષનો પ્રેમ સદાય વરસે અપરંપાર... - અંકિત ત્રિવેદી સાચા પડવ...

જય સ્વામિનારાયણ  "In the joy of others lies our own." પળેપળ આ સૂત્રને ચરિતાર્થ કરનાર અને પળેપળ આ સૂત્ર અનુસાર જ જીવનાર એવા વિશ્વ વંદનીય વિરલ સંત વિભૂતિ પરમ પૂજ્ય પ્રમુખસ્વામી મહારાજ વિશે તો આપણે સૌ પરિચિત છીએ.  એક એવું વિરલ અને વિરાટ વ્યક્તિત્વ કે જેમણે સમગ્ર જગતને 1100 થી વધુ મંદિરો અને 1000 કરતાં પણ વધુ "શિક્ષિત સંતોની" ભેટ આપીને સમગ્ર વિશ્વને સનાતન ભારતીય સંસ્કૃતિનો પરિચય કરાવ્યો. પોતાના સમગ્ર જીવન દરમિયાન લગભગ 45 કરતાં વધુ દેશોમાં ફરીને 17,000 થી પણ વધુ શહેરો, ગામડાઓ તથા કસબાઓમાં વિચરણ કરી તે ભૂમિને પાવન કરી, 7,60,000 કરતાં પણ વધુ પત્રો લખીને લોકોના પ્રશ્નો ઉકેલ્યા - તેમની મૂંઝવણો દૂર કરી, 8,10,000 કરતાં પણ વધુ લોકોને વ્યક્તિગત મુલાકાતો દ્વારા આશીર્વાદ પાઠવ્યા.  કોઈપણ કુદરતી આપદ્દાઓ વખતે જરૂરી રાહત સહાય ની વ્યવસ્થા કરીને સમાજ ની જરૂરિયાતોને દેશ કે વિદેશના કોઈપણ ખૂણે તરત જ જવાબ આપ્યો છે. પ્રમુખસ્વામી મહારાજની કરુણા અજોડ છે. કોઈપણ વય, લિંગ, દરજ્જો, જાતિ અથવા સંપ્રદાયને ધ્યાનમાં લીધા વિના બધા સુધી તેઓ પહોંચ્યા છે. રાત્રે 2 વાગે પણ અધવચ્ચે ભર ઊંઘમાંથી જાગીને પણ પ્રા...

ના, ભારતીય ટીમના ચકલા (ટીખળ) ઉડાડવા માટે આવું શીર્ષક નથી રાખ્યું. 1975માં ઈંગ્લેન્ડથી શરૂ થયેલ icc મેન્સ ક્રિકેટ વર્લ્ડ કપમાં 1983માં ખતરનાક વેસ્ટ ઇન્ડિઝની ટીમ સામે કપિલ દેવની અણનમ (175) ધૂઆંધાર બેટિંગ થકી ભારતીય ટીમ વર્લ્ડ કપ લઈને આવી એ પછી છેક ત્રણ દાયકે 2011માં મહેન્દ્ર સિંહ ધોની જેવા કાબેલ અને સર્વોત્તમ કપ્તાન અને તેની લાજવાબ કપ્તાની થકી ભારતીય ટીમના ગ્રહ બેસેલા. હા, આમ તો સમગ્ર ટીમનું યોગદાન ગણાય વર્લ્ડ કપ જીતવા માટે. પરંતુ એ વખતની જેવી તેવી ન ગણાય એવી શ્રીલંકન ક્રિકેટ ટીમ સામે યોગ્ય ગેમ પ્લાન અને બેટિંગ તેમજ બોલિંગની વ્યૂહરચનાઓ દ્વારા એ વખતનો વર્લ્ડ કપ ભારતના હાથમાં આવેલો. ધોની અને તેનું ધોનીત્વ તો આજે પણ શાશ્વત છે. ખુદ એને ક્રીઝ પર રમતા જોયો છે અને વિકેટ કિપિંગમાં રહી જેમ સ્ટિયરિંગ પર કંટ્રોલ હોય તો રસ્તામાં અચાનક આવતા મોડ પર ફસકી ન પડીએ એમ ગેમમાં આવતા અણધાર્યા મોડ પર ખડા અને ખરા ઉતરવાના નિર્ણયો લેતા જોયો છે. તેની એ અદ્ભુત અને કાબિલે તારીફ કપ્તાની થકી જ આઈસીસી ની ત્રણ ત્રણ ટ્રોફીનો રેકોર્ડ માત્ર ધોનીના નામે જ કપ્તાન તરીકે બોલે છે. ને એના ગયા પછી આઈસીસી ની એક પણ ટ્રોફી ભારતના નામ...

રતન તાતાના જીવન ચરિત્રમાં વર્ષ 2012ના એક પ્રસંગનો ઉલ્લેખ છે. ત્યારે તાતા ઈન્ડસ્ટ્રીઝના કર્તાહર્તા સમાન રતન તાતાએ ચેરમેન પદેથી રાજીનામું આપી દીધેલું અને પોતાનું સ્થાન સાયરસ મિસ્ત્રીને સોંપ્યું હતું. પત્રકારોએ પૂછ્યું કે તમે સાયરસ મિસ્ત્રીને કોઈ સલાહ આપી છે? તો રતન તાતાએ જણાવ્યું હતું કે, 'ના, મેં કોઈ સલાહ નથી આપી. કેમ કે મેં જ્યારે મારી કરિયરની શરૂઆત કરી હતી, ત્યારે મને લોકોએ પ્રશ્ન કર્યો હતો કે આપ આપના રોલમોડેલ જે.આર.ડી. તાતા જેવા બનવા માંગો છો? તેમના જેવું કામ કરશો?' ત્યારે મેં ઉત્તર વાળ્યો હતો કે, 'નહીં, હું મારા મૂલ્યો અને ક્ષમતાના આધારે કામ કરીશ. હું સાયરસ મિસ્ત્રી પાસેથી પણ એ જ અપેક્ષા રાખું છું કે તે રતન તાતા બનવાની કોશિશ ન કરે. પોતાના મૂલ્યો અને ક્ષમતાના આધારે જ પોતાની આગવી ઓળખ બનાવે અને કંપનીને સફળતાના નવા શિખરો સુધી પહોંચાડે.' આ તો માત્ર એક પ્રસંગ થયો. પણ રતન તાતાએ પોતાના જીવનમાં અનેક એવા કામ કર્યા, જેને કારણે તેમની હંમેશા પ્રશંસા જ થઈ. આજે એકપણ વ્યક્તિ એવો નહીં મળે કે જેને રતન તાતા પ્રત્યે અણગમો હોય. દરેક ઉદ્યોગપતિ તેમના જેવા બનવા ચાહે છે. ન કેવળ ઉદ્યોગપતિ જ પ...

ભારતમાં છેલ્લા 9 વર્ષથી એકહથ્થુ શાસન ભારતીય જનતા પાર્ટીનું રહ્યું છે. એવામાં લોકસભાની ચૂંટણીના પડઘમ વાગવાના શરૂ થયા છે ત્યારે હમણાં જ ભારતીય જનતા પાર્ટીએ ચારમાંથી ત્રણ રાજ્યોની વિધાનસભા ચુંટણીમાં રેકોર્ડ બ્રેક જીત મેળવી અને આવનારી લોકસભાની ચૂંટણીના પરિણામોનો આગોતરો અંદેશો આપી દીધો. રાજસ્થાન, મધ્ય પ્રદેશ અને છત્તીસગઢ આ ત્રણેય રાજ્યો કુલ 65 સીટો લોકસભામાં ધરાવે છે. જ્યારે તેલંગાણાના માત્ર 11 જ સાંસદો છે લોકસભામાં. મધ્ય પ્રદેશમાં ભારતીય જનતા પાર્ટીનો વોટ શેર 49% જેટલો છે જ્યારે કોંગ્રેસનો 40% જેટલો. રાજસ્થાનમાં બીજેપી 42% અને કોંગ્રેસ 30% વોટ શેર ધરાવે છે. જ્યારે છત્તીસગઢમાં બીજેપી પાસે 46% અને કોંગ્રેસ પાસે 42% વોટ શેર છે. એટલે અત્યારની જીત ખૂબ મહત્વની પુરવાર થાય એમ છે ભારતીય જનતા પાર્ટી માટે. હા, ભારતીય જનતા પાર્ટી દરેક રાજ્યોમાં વિધાનસભા ચૂંટણી નથી જીતતી. અત્યારે બીજેપી ની 12 રાજ્યોમાં સરકાર છે. જ્યારે કોંગ્રેસની માત્ર 3 રાજ્યોમાં. વધુ વિસ્તૃત અહેવાલ જોઈએ તો આખા ભારતના કુલ ક્ષેત્રફળનો 58% વિસ્તાર અને કુલ વસ્તીની 57% વસ્તી પર ભારતીય જનતા પાર્ટીનું શાસન છે. જ્યારે સામે પક્ષે 41% ક્ષેત્રફ...

'મારો ધ્યેય ભારતમાંથી બહાર આવી રહેલા વિશ્વના કેટલાક બદલાતા વિચારો અને અવનવી શોધ વિશે અપડેટ મેળવવાનો હતો, અને મારે જે જોઈતું હતું તે જ મને મળ્યું. મેં ત્યાં ચાર દિવસ વિતાવ્યા જેમાં અલગ અલગ રાજકીય નેતાઓ, સરકારી અધિકારીઓ, વૈજ્ઞાનિકો અને અન્ય ઘણા લોકો સાથે મુલાકાત કરી.' બિલ ગેટ્સે તેમની તાજેતરની મુલાકાત બાદ તેમના એક બ્લોગમાં આ વિધાનો ઉચ્ચાર્યા છે. આ બધાની વચ્ચે તેમની પ્રધાનમંત્રી સાથેની મુલાકાત સૌથી મહત્વપૂર્ણ હતી. જેમાં ખુદ બિલ ગેટ્સે ડિજિટલ ટેક્નોલોજી, AI, કૃષિ, હેલ્થ, એજ્યુકેશન અને વૈશ્વિક આબોહવા પરિવર્તન પર ઘણી જ ઊંડાણપૂર્વક ચર્ચા સાથે પ્રશ્નોત્તરી કરી. આ મુલાકાતની થીમ હતી, 'From AI to Digital Payments'. આ ઇન્ટરવ્યુ આપણા માટે જાણવા યોગ્ય છે. પ્રસ્તુત છે આજના આ લેખમાં... બિલ ગેટ્સ: G20 હવે ઘણું જ વ્યાપક થઈ ચૂક્યું છે. તેથી ભારતે ખરેખર ડિજિટલ ઈનોવેશન જેવી બાબતોને પ્રોત્સાહન આપ્યું છે તે જોઈને આનંદ થયો. G20 ખરેખર એક એવું મિકેનિઝમ બની શકે છે જે પારસ્પરિક સંબંધોને સુધારી શકે છે. PM મોદી: તમારી વાત સાચી છે, 'જ્યારે હું ઇન્ડોનેશિયામાં G-20 સમિટમાં ગયો હતો, ત્યારે વિશ્વના ત...